Ashxobodda sun’iy intellekt va kiberxavfsizlik bo‘yicha «C5+1» mintaqaviy seminari bo‘lib o‘tdi
Amul Info · · asgabat, ashgabat
Ashxobodda Markaziy Osiyo davlatlari va AQSh vakillari ishtirokida sun’iy intellekt, kiberxavfsizlik va raqamlashtirishga bag‘ishlangan ikki kunlik mintaqaviy seminar bo‘lib o‘tdi. Unda axborot tizimlarini himoya qilish, sun’iy yo‘ldosh aloqasi, Data Centerlar va sun’iy intellekt texnologiyalari…
Ashxobodda Markaziy Osiyo mamlakatlari va AQSh vakillari ishtirokida sun’iy intellekt, kiberxavfsizlik va raqamlashtirish masalalariga bag‘ishlangan ikki kunlik «C5+1: ishonchli sun’iy intellekt va raqamlashtirish» nomli mintaqaviy seminar o‘tkazildi.
Turkmaniston Tashqi ishlar vazirligining xabar berishicha, tadbirda Markaziy Osiyo davlatlari va AQShning tegishli davlat idoralari vakillari, xalqaro kompaniyalar mutaxassislari hamda yuqori texnologiyalar sohasi ekspertlari qatnashdilar. Seminar AQSh Savdo vazirligining Tijorat huquqini rivojlantirish dasturi (CLDP) ko‘magida tashkil etildi.
Seminarning asosiy maqsadi ishonchli va barqaror axborot-kommunikatsiya infratuzilmasini yaratish bilan bog‘liq masalalarni muhokama qilishdan iborat bo‘ldi. Ishtirokchilar muhim axborot tizimlarini himoya qilish, radiochastota spektrini boshqarish, sun’iy yo‘ldosh aloqasini rivojlantirish, shuningdek, zamonaviy ma’lumotlarni qayta ishlash markazlarini (Data Center) loyihalashtirish va ishga tushirish bo‘yicha xalqaro standartlarni muhokama qildilar.
Maxsus majlislarda sun’iy intellekt texnologiyalarini joriy etish va kompleks kiberxavfsizlikni ta’minlash bo‘yicha umumiy yondashuvlarni ishlab chiqish masalasiga alohida e’tibor qaratildi.
Shuningdek, vakillar raqamli bozorlarni tartibga solish bo‘yicha tajriba almashdilar, texnologik loyihalarni moliyalashtirishning xalqaro mexanizmlarini muhokama qildilar va «C5+1» formatida uzoq muddatli mintaqaviy hamkorlikning ustuvor yo‘nalishlarini belgilab berdilar.