TIF 2026: türkmen işewürleri halkara kompaniýalar bilen duşuşyklary häzirden belläp biler
Amul Info ·
1–2-nji oktýabrda Aşgabatda geçiriljek TIF 2026 forumynda türkmen telekeçileri 40-dan gowrak ýurtdan gelýän kompaniýalaryň wekilleri we halkara maliýe institutlary bilen göni duşuşyp biler. Duşuşyklary TIF 2026-nyň Attendee Hub ulgamy we ykjam goşundysy arkaly öňünden bellemek mümkin.
2026-njy ýylyň 1–2-nji oktýabrynda Aşgabatda geçiriljek Türkmenistanyň Maýa goýum forumy (TIF 2026) türkmen işewürleri üçin daşary ýurt kompaniýalary we halkara maliýe institutlary bilen göni gepleşikleri geçirmek üçin giň mümkinçilik döreder.
Forumyň çäklerinde 40-dan gowrak ýurtdan 200-den köp daşary ýurt kompaniýasynyň wekilleriniň Aşgabatda jemlenmegine garaşylýar. Iki günüň dowamynda «Ýyldyz» myhmanhanasynda geçiriljek duşuşyklaryň üsti bilen türkmen telekeçileri uzak aralykdan ýörite sapar guramagy talap edýän kompaniýalaryň wekilleri bilen göni aragatnaşyk gurup bilerler.
Duşuşygy öňünden bellemek mümkin
TIF 2026-nyň esasy mümkinçilikleriniň biri gatnaşyjylaryň gyzyklanýan kompaniýalaryň wekilleri bilen duşuşyklary özbaşdak öňünden belläp bilmegidir.
Forumda hasaba alnan gatnaşyjylara şahsy Attendee Hub otagy we TIF 2026 ykjam goşundysy hödürlenýär. Goşundy arkaly forumyň gatnaşyjylarynyň sanawy bilen tanyşmak, kompaniýalar barada maglumat almak we olaryň wekillerini tapmak mümkin.
Gyzyklanýan kompaniýany saýlap, duşuşyk geçirmek baradaky haýyşy ibermek ýeterlik. Duşuşygyň wagty we geçiriljek ýeri taraplaryň özara ylalaşygy esasynda kesgitlenýär. Şeýle mümkinçilikden forum başlamazdan öň hem peýdalanmak bolýar.
Şeýle hem çäräniň başlanmagyna çenli işewür duşuşyklaryň gutarnykly maksatnamasynyň emele gelmegine garaşylýar.
Dünýäniň iri kompaniýalary bilen göni gepleşikler
TIF 2026-da Ýaponiýanyň işewür toparlary giňden wekilçilik eder. Olaryň arasynda Mitsubishi Corporation, Mitsubishi Heavy Industries, ITOCHU, Sumitomo Corporation, Kawasaki Heavy Industries we Mizuho banky ýaly kompaniýalar bar.
Günorta Koreýadan Samsung C&T we Daewoo Engineering, Germaniýadan bolsa John Deere, CLAAS, WIRTGEN Group we Siemens Energy ýaly kompaniýalar forumyň işine gatnaşar.
Gämi gurluşygy pudagynda Damen Shipyards, energetika we nebit-gaz ulgamynda TotalEnergies, Dragon Oil we ADNOC, awtomobil pudagynda Toyota Central Asia ýaly kompaniýalar öz çözgütlerini we tejribelerini hödürlär.
Maliýe pudagynda Oppenheimer & Co we Moody’s, hukuk hyzmatlary boýunça Fieldfisher, tehnologiýa ulgamynda bolsa Canaan we Bitdeer ýaly kompaniýalar wekilçilik eder.
Forumda Bütindünýä banky, Halkara maliýe korporasiýasy (IFC), Aziýanyň ösüş banky, Ýewropanyň Täzeleniş we Ösüş banky, Yslam Ösüş banky we Hytaýyň Eksport-import banky ýaly halkara ösüş we maliýe institutlarynyň hem gatnaşmagy meýilleşdirilýär.
Pudaklar boýunça hyzmatdaşlyk üçin mümkinçilikler
TIF 2026 türkmen işewürlerine dürli ugurlarda hyzmatdaşlyk mümkinçiliklerini ara alyp maslahatlaşmaga şert döredýär.
Oba hojalygy pudagynda John Deere, CLAAS we Jiangsu World kompaniýalary bilen oba hojalyk tehnikalary we hyzmatlar boýunça gepleşik geçirmek mümkin.
Gurluşyk ulgamynda Samsung C&T, WIRTGEN, Gap İnşaat we Rönesans ýaly kompaniýalar bilen potratçylyk we taslamalary ýerinde durmuşa geçirmek meseleleri ara alnyp maslahatlaşylyp bilner.
Nebit-gaz pudagynda Siemens Energy, Mitsubishi Heavy Industries we Tatneft bilen enjamlar, tehnologik çözgütler we degişli hyzmatlar boýunça hyzmatdaşlygyň mümkinçiliklerini öwrenmek mümkin.
Logistika ulgamynda Damen, TAV Technologies we Betamont ýaly kompaniýalar bilen, eksport amallary boýunça bolsa Türkiýäniň Karavan, Hytaý–ŞHG giňişligindäki AEEX, Tatarystan Söwda öýi we ABŞ-nyň TABCA söwda platformalary bilen gepleşik geçirmek üçin mümkinçilikler döredilýär.
Türkmen kompaniýalary hem forumyň gatnaşyjylarynyň arasynda
TIF 2026-nyň gatnaşyjylarynyň arasynda türkmen kompaniýalary hem bar. Olaryň hatarynda Hazar Gurluşyk, Türkmen Enjam, Aýdyň Gijeler, Beýik Ýüpek Ýoly, Watan Rowaçlygy, Dowa, Ak Harman, Ýedi-Ýer, Döwlet Gurluşyk, Nexia Turkmenistan we Hukukçy ýaly kompaniýalar görkezilýär.
Bu ýagdaý forumyň diňe daşary ýurt kompaniýalary bilen duşuşyklar üçin däl, eýsem türkmen işewürleriniň özara hyzmatdaşlygyny ösdürmek üçin hem möhüm meýdança bolup biljekdigini görkezýär.
Sekiz esasy ugur
Forumyň iki günlük işewürlik maksatnamasyna sekiz mowzuklaýyn sessiýa girýär. Olaryň arasynda nebit-gaz, himiýa, energetika we gurluşyk, ulag we logistika, söwda we döwlet-hususy hyzmatdaşlygy, oba hojalyk işewürligi, halkara maliýe institutlary bilen hyzmatdaşlyk, şeýle hem wirtual aktiwler, innowasiýalar we «ýaşyl» özgertmeler ýaly ugurlar bar.
Öňki forumlaryň tejribesi işewür hyzmatdaşlygyň diňe resmi sessiýalaryň dowamynda däl, eýsem ikitaraplaýyn ýüzbe-ýüz duşuşyklarda hem ösdürilýändigini görkezýär.
Şol sebäpli TIF 2026-a gatnaşjak türkmen işewürlerine duşuşyklary öňünden meýilleşdirmek, kompaniýasy barada iňlis dilinde gysga we düşnükli tanyşdyryş maglumatyny taýýarlamak hem-de her bir duşuşykdan garaşylýan anyk netijäni öňünden kesgitlemek maslahat berilýär.
TIF 2026 barada giňişleýin maglumat forumyň resmi internet sahypasynda ýerleşdirilýär: tif-turkmenistan.com .