Aşgabatda emeli aň we kiberhowpsuzlyk boýunça «C5+1» sebit seminary geçirildi
Amul Info · · asgabat, ashgabat
Aşgabatda Merkezi Aziýa ýurtlarynyň we ABŞ-nyň wekilleriniň gatnaşmagynda emeli aň, kiberhowpsuzlyk we sanlylaşdyrmak boýunça iki günlük sebit seminary geçirildi. Çärä gatnaşyjylar maglumat ulgamlaryny goramak, hemra aragatnaşygy, Data Center-lar we emeli aň tehnologiýalary boýunça hyzmatdaşlygy…
Aşgabatda Merkezi Aziýa ýurtlarynyň we ABŞ-nyň wekilleriniň gatnaşmagynda emeli aň, kiberhowpsuzlyk we sanlylaşdyrmak meselelerine bagyşlanan iki günlük «C5+1: ygtybarly emeli aň we sanlylaşdyrmak» atly sebit seminary geçirildi.
Türkmenistanyň Daşary işler ministrliginiň habar bermegine görä, çärä Merkezi Aziýa döwletleriniň we ABŞ-nyň degişli döwlet edaralarynyň wekilleri, halkara kompaniýalaryň hünärmenleri hem-de ýokary tehnologiýalar ulgamynyň bilermenleri gatnaşdy. Seminar ABŞ-nyň Söwda ministrliginiň Söwda hukugyny ösdürmek maksatnamasynyň (CLDP) goldawy bilen geçirildi.
Seminaryň esasy maksady ygtybarly we durnukly maglumat-kommunikasiýa infrastrukturasyny döretmek bilen bagly meseleleri ara alyp maslahatlaşmakdan ybarat boldy. Gatnaşyjylar möhüm maglumat ulgamlarynyň goragyny, radioýygylyk spektrini dolandyrmagy, hemra aragatnaşygyny ösdürmegi, şeýle hem häzirki zaman maglumatlary gaýtadan işleýän merkezlerini (Data Center) taslamak we işletmek boýunça halkara standartlary ara alyp maslahatlaşdylar.
Ýörite mejlislerde emeli aň tehnologiýalaryny ornaşdyrmak we toplumlaýyn kiberhowpsuzlygy üpjün etmek boýunça umumy çemeleşmeleri işläp taýýarlamak meselesine aýratyn üns berildi.
Şeýle hem wekiller sanly bazarlary düzgünleşdirmek boýunça tejribe alyşdylar, tehnologik taslamalary maliýeleşdirmegiň halkara mehanizmlerini ara alyp maslahatlaşdylar we «C5+1» formatynda uzak möhletleýin sebit hyzmatdaşlygynyň ileri tutulýan ugurlaryny kesgitlediler.